ဧပြီလ (၂၁) ရက်နေ့မှ စတင်၍ မလေးရှားနိုင်ငံတွင် ပညာရေးဝန်ကြီးဌာနလက်အောက်ရှိ ပညာရေးအဖွဲ့အစည်းများမှ ကျောင်းသားကျောင်းသူများအားလုံး ၎င်းတို့၏ ယူနီဖောင်းများတွင် နိုင်ငံတော်အလံတံဆိပ်ကို မဖြစ်မနေ တပ်ဆင်ကာ ဝတ်ဆင်ရမည်ဖြစ်သည်။
ပညာရေးညွှန်ကြားရေးမှူးချုပ် Datuk Azman Adnan က ကျောင်းယူနီဖောင်းများတွင် နိုင်ငံတော်အလံတံဆိပ်ကို တပ်ဆင်ရန် လမ်းညွှန်ချက်ကို ဖေဖော်ဝါရီ (၁၄) ရက်၊ ၂၀၂၅ ခုနှစ်တွင် အစိုးရအဖွဲ့မှ အတည်ပြုခဲ့ကြောင်း ဆိုသည်။
ဤညွှန်ကြားချက်အသစ်သည် အစိုးရကျောင်းများ၊ အစိုးရထောက်ပံ့သည့်ကျောင်းများ၊ တက္ကသိုလ်ဝင်တန်းကောလိပ်များနှင့် ဆရာအတတ်ပညာကျောင်းများ (IPG) အားလုံးနှင့် သက်ဆိုင်ပါသည်။
ဝန်ကြီးဌာနသည် အခြားသောကျောင်းများကိုလည်း အဆိုအပါ အလေ့အထကို ကျင့်သုံးရန် တိုက်တွန်းထားသည်။ ရည်ရွယ်ချက်မှာ ကျောင်းသားများအကြား စည်းလုံးညီညွတ်မှု၊ စည်းကမ်းနဲ့ တာဝန်ဝတ္တရားများကို သိရှိစေရန်နှင့် တိုင်းပြည်အပါ် လေးစားပြီး ချစ်မြတ်နိုးစိတ်ကို သွတ်သွင်းရန် ဖြစ်သည်။
လမ်းညွှန်ချက်အရ ကျောင်းသားများသည် ၎င်းတို့၏ ယူနီဖောင်း၏ ညာဘက်ခြမ်းတွင် အလျား 5cm နှင့် အကျယ် 2.5cm ရှိသော နိုင်ငံတော်အလံတံဆိပ်ကို တပ်ဆင်ကာ ၀တ်ဆင်ရမည်ဖြစ်ပါသည်။ နိုင်ငံတော်အလံတံဆိပ်ကို ယူနီဖောင်း၏ ညာဘက်ခြမ်းတွင် တပ်ဆင်ရမည်ဖြစ်ပြီး ဘယ်ဘက်ခြမ်းတွင် ရှိသော ကျောင်းသားနာမည်တံဆိပ်နဲ့ တစ်တန်းတည်း ဖြစ်ရပါမည်။
ကျောင်းသားများသည် ယူနီဖောင်းပေါ်က တံဆိပ်၏ အရွယ်အစား၊ ပုံသဏ္ဍာန်၊ အရောင် (သို့မဟုတ်) အနေအထားကို ပြောင်းလဲ၍ မရသည့်အပြင် ဟောင်းနွမ်းနေသော (သို့မဟုတ်) မှိန်သော တံဆိပ်များကို အသစ်များဖြင့် အစားထိုးရပါမည်။ အခြားအသုံးအဆောင်ပစ္စည်းများဖြင့် နိုင်ငံတော်အလံကို အလှဆင်ခြင်းကိုလည်း ခွင့်မပြုပါ။
ကျောင်းသားများသည် ကျောင်းယူနီဖောင်းများအပြင် အားကစားဝတ်စုံ၊ ရိုးရာဝတ်စုံ၊ သင်ရိုးပြင်ပလှုပ်ရှားရေးဝတ်စုံနှင့် အသက်မွေးဝမ်းကျောင်းကောလိပ်မှ ကော်ပိုရိတ်ရှပ်တို့တွင်လည်း နိုင်ငံတော်အလံတံဆိပ်ကို တပ်ဆင်ရပါမည်။
ပြည်နယ်နှင့် ခရိုင်ပညာရေးမှူးရုံးများသည် ထိုညွှန်ကြားချက်ကို အကောင်အထည်ဖော်မှုအား စောင့်ကြည့်လေ့လာခြင်းအပြင် စာသင်ကျောင်းများတွင် နိုင်ငံတော်တန်ဖိုးများဆိုင်ရာ အသိပညာပေးအစီအစဉ်များ လုပ်ဆောင်ရန် လိုအပ်ကြောင်း အဆိုပါလမ်းညွှန်ချက်တွင် ပါဝင်သည်။