ဆရာတွေအတွက် စဉ်ဆက်မပြတ် စွမ်းရည်မြှင့်တင်နိုင်မယ့် နည်းလမ်းများ

ဘယ်လုပ်ငန်းခွင်မှာမဆို အလုပ်လုပ်နေသူတိုင်းက သက်ဆိုင်ရာအလုပ်အတွက် တိုးတက်မှုရှိဖို့ မရပ်တန့်ဘဲ  ဆက်လက် လေ့လာနေဖို့ အထူး လိုအပ်ပါတယ်။ ထိုနည်းတူ သင်ကြားရေးနယ်ပယ်က ဆရာတွေကလည်း ခေတ်မီတိုးတက်နေတဲ့ ပညာရေးအခင်းအကျင်းကို အမှီလိုက်နိုင်ဖို့အတွက် ကိုယ့်ကိုယ်ကိုယ် မွမ်းမံပြင်ဆင်ထားရပါမယ်။ 

စာသင်ခန်းအတွင်း သင်ကြားနည်းအသစ်တွေ၊ နည်းပညာတိုးတက်မှုတွေနဲ့ ပြောင်းလဲလာတဲ့ ကျောင်းသားလိုအပ်ချက်တွေကို ထိထိရောက်ရောက်နဲ့ စီမံခန့်ခွဲနိုင်ဖို့ စဉ်ဆက်မပြတ် လေ့လာနေရပါမယ်။ ဒါကြောင့် ဆရာတွေအတွက် လုပ်ငန်းခွင်မှာ ကျွမ်းကျင်ပြီး ရှေ့ရောက်နေဖို့အတွက် လုပ်ဆောင်သင့်တဲ့ လက်တွေ့ကျတဲ့နည်းလမ်းတချို့ကို မျှဝေပေးသွားပါမယ်။

၁။ အဆင့်မြင့်ဘွဲ့ (သို့) အသိအမှတ်ပြုလက်မှတ်တွေ ယူပါ

အဆင့်မြင့်ဒီဂရီတွေ (သို့မဟုတ်) အသိအမှတ်ပြု အောင်လက်မှတ်တွေကို ရရှိဖို့ ကျောင်းတွေ (သို့) သင်တန်းတွေ ဆက်တက်သင့်ရင် တက်ရပါမယ်။ ပညာရေးနယ်ပယ်မှာ ဘွဲ့ကြို ရထားသူတွေက မာစတာ (သို့) ဘွဲ့လွန်ဒီပလိုမာသင်တန်းတွေ ဆက်တက်တာ၊ ပညာရေးဆိုင်ရာ အထူးပြု Certificate တွေယူတာ စတာတွေက အသက်မွေးဝမ်းကြောင်း အခွင့်အလမ်းသစ်တွေကို ဖွင့်ပေးပြီး ဘာသာရပ်တစ်ခုပေါ် ကျွမ်းကျင်မှုကို နက်ရှိုင်းစေပါတယ်။ 

အင်္ဂလိပ်စာဆရာဖြစ်ချင်သူက သင်ကြားရေးအစီအစဉ်တွေ၊ သင်ကြားရေးဆိုင်ရာ ဗျူဟာတွေ အပါအဝင် ဘာသာရပ်ဆိုင်ရာ ကျွမ်းကျင်မှုရှိဖို့ အင်္ဂလိပ်စာသင်ကြားရေးနဲ့ ပတ်သက်တဲ့ အောင်လက်မှတ်တွေ ရှိထားရမှာ ဖြစ်ပါတယ်။

၂။ ကာလတိုသင်တန်းတွေ တက်ပါ

နည်းပညာခေတ်မှာ အပြင်သင်တန်းအထိ သွားစရာမလိုဘဲ ဖုန်းနဲ့ အင်တာနက်ရှိရုံနဲ့ ကိုယ်လေ့လာချင်တာကို အိမ်မှာနေရင်း လေ့လာလို့ရတဲ့အထိ လွယ်ကူနေပြီဖြစ်ပါတယ်။ Coursera၊ EdX နဲ့ Alison တို့လို နာမည်ကြီး ပညာရေးပလပ်ဖောင်းတွေမှာ သင်ကြားရေးဆိုင်ရာ ခေါင်းစဉ်အမျိုးမျိုးကို အချိန်တိုတိုနဲ့ လေ့လာလို့ရတဲ့ အွန်လိုင်းသင်တန်းတွေ များစွာ ရှိပါတယ်။

သင်ကြားရေးနယ်ပယ်က ဆရာတွေအတွက် ဒီလို သင်တန်းတွေကနေတဆင့် သင်ကြားရေးနည်းဗျူဟာအသစ်တွေကို လေ့လာဖို့၊ ပေါ်ပေါက်လာတဲ့ ခေတ်ရေစီးကြောင်းတွေကို နားလည်ဖို့၊ ဘာသာရပ်ဆိုင်ရာ အသိပညာ တိုးမြှင့်ဖို့နဲ့ စာသင်ခန်းစီမံခန့်ခွဲဖို့တို့အတွက် အခွင့်အရေး ရရှိနိုင်ပါတယ်။  

၃။ အလုပ်ရုံဆွေးနွေးပွဲတွေ သွားပါ

Workshop နဲ့ Conference တွေ တက်ရောက်ခြင်းက ပညာရေးနယ်ပယ်အတွင်းမှာ ရှိတဲ့ ကျွမ်းကျင်းသူတွေဆီကနေ လေ့လာသင်ယူနိုင်တဲ့အပြင် နယ်ပယ်တူ ဆရာ၊ ဆရာမတွေနဲ့လည်း တွေ့ဆုံမိတ်ဆက်ပြီး Network တည်ဆောက်နိုင်ပါတယ်။ ဒီဆွေးနွေးပွဲတွေကနေတဆင့် အဓိကအရေးကြီးအချက်တွေ သိလာမယ်၊ ကျွမ်းကျင်သူတွေရဲ့ အုပ်စုဖွဲ့ ဆွေးနွေးမှုတွေမှာ အိုင်ဒီယာအသစ်တွေ ရလာမယ်၊ လက်တွေ့လှုပ်ရှားမှုတွေကို လုပ်ဆောင်ပြီး မိမိသင်ကြားရေးအလေ့အကျင့်ကို တိုးမြှင့်လုပ်ဆောင်နိုင်မယ်။

၄။ လုပ်ဖော်ကိုင်ဖက်တွေနဲ့ ပူးပေါင်းပါ

လုပ်ဖော်ကိုင်ဖက်တွေဆီက သင်ယူခြင်းကလည်း ပိုက်ဆံပေးပြီး အတန်းတက်ခြင်းလို အကျိုးသက်ရောက်မှု ရှိနိုင်ပါတယ်။ သင်ကြားရေးအဖွဲ့အစည်းတွေ၊ အွန်လိုင်းဖိုရမ်တွေ၊ ဆိုရှယ်မီဒီယာအဖွဲ့တွေမှာ ပါဝင်ခြင်းက ဆရာတွေအတွက် သင်ကြားရေးအလေ့အကျင့်တွေကို မျှဝေနိုင်တဲ့အပြင် လုပ်ဖော်ကိုင်ဖက် (သို့) ကျွမ်းကျင်သူတွေထံကနေ အကြံဉာဏ်ကောင်းတွေလည်း ရယူနိုင်ပါတယ်။ 

ဥပမာ - သင်က ကျောင်းသားတွေကို စိတ်ဝင်စားအေင် သင်ကြားဖို့ နည်းလမ်းလေးတွေ လိုအပ်တယ်ဆိုရင် သင်ကြားရေးဆိုင်ရာ Facebook group တွေမှာ အကြံဉာဏ်တွေ၊ အယူအဆတွေ၊ နည်းလမ်းတွေကို မေးမြန်းနိုင်ပါတယ်။

၅။ သုတေသနနှင့် ခေတ်ရေစီးကြောင်းနောက် လိုက်ပါ

ပညာရေးက အမြဲတစေ တိုးတက်ပြောင်းလဲနေပြီး ဖွံ့ဖြိုးတိုးတက်မှုအသစ်အသစ်တွေကို သိရှိဖို့က အရေးကြီးပါတယ်။ ဒါကြောင့် ပညာရေးဆိုင်ရာ သတင်းတွေ၊ စာအုပ်တွေ၊ သုတေသနစာတမ်းတွေ၊ အွန်လိုင်းဆောင်းပါးတွေကို မပျက်မကွက် ဖတ်ရှုသင့်ပြီး စာဖတ်ရတာ ပျင်းတဲ့သူတွေကတော့ Podcast တွေ၊ Talkshow တွေကို နားထောင်ရပါမယ်။ ဒါ့အပြင် LinkedIn (သို့မဟုတ်) Twitter တို့လို ဆိုရှယ်ပလပ်ဖောင်းတွေမှာ ပညာရေးဆိုင်ရာ အတွေးအခေါ်တွေ ရရှိဖို့ ပညာရေးခေါင်းဆောင်တွေကိုလည်း ဖော်လိုးလုပ်ထားသင့်ပါတယ်။

၆။ သင်ကြားရေးနည်းပညာအသစ်တွေ အသုံးပြုပါ

ပညာရေးမှာ နည်းပညာရဲ့ အခန်းကဏ္ဍက အရေးပါလာပြီဖြစ်တဲ့အတွက် ဆရာအများစုက Digital tools တွေကို အသုံးပြုပြီး ကျောင်းသားတွေအတွက် ပိုမိုဆွဲဆောင်မှုရှိတဲ့ သင်ကြားရေးအတွေ့အကြုံတွေကို ဖန်တီးနိုင်ပါတယ်။ Learning management systems (LMS)၊ AI Tools၊ Game Apps စတာတွေကို အသုံးပြုတတ်မယ်ဆိုရင် သင်ခန်းစာတွေကို စိတ်ဝင်စားအောင် လုပ်ဆောင်နိုင်ပြီး ကျောင်းသားတစ်ဦးချင်းစီရဲ့ လိုအပ်ချက်အပေါ်  သင်ခန်းစာကို စိတ်ကြိုက် ပြင်ဆင်နိုင်ပါတယ်။ 

ဥပမာ - သမိုင်းသင်တဲ့ ဆရာတစ်ဦးက ကျောင်းသားတွေကို သမိုင်းဝင်နေရာတွေပြမယ်ဆိုရင် ပုံတွေကို VR (virtual reality) အနေနဲ့ ကြည့်လို့ရမယ့် Google Expeditions ကို အသုံးပြုသင့်ပါတယ်။

၇။ Soft Skills တွေကို မြှင့်တင်ပါ

ဆရာတစ်ယောက်အနေနဲ့ သင်ကြားရေးဆိုင်ရာ စွမ်းရည်တွေ၊ ဘာသာရပ် ကျွမ်းကျင်မှုတွေက မရှိမဖြစ် အရေးကြီးတယ်ဆိုပေမဲ့လည်း ပြောဆိုဆက်သွယ်ရေး၊ လိုက်လျောညီထွေရှိမှု၊ စာနာမှုနဲ့ ခေါင်းဆောင်စွမ်းရည် စတဲ့ Soft Skills တွေက ပညာရေးနယ်ပယ်မှာ တန်းတူအရေးကြီးတဲ့ အရာတွေပါ။ ဒီစွမ်းရည်တွေ ရှိထားတဲ့ ဆရာတွေကသာ ကျောင်းသားတွေအတွက် ထိရောက်ပြီး ပိုမို ပံ့ပိုးကူညီနိုင်တဲ့ သင်ယူမှုပတ်ဝန်းကျင်ကို ဖန်တီးပေးနိုင်မှာ ဖြစ်ပါတယ်။

ဆရာတွေအနေနဲ့ စွမ်းရည်မြှင့်တင်ခြင်းက စဉ်ဆက်မပြတ် လုပ်ဆောင်နေရမယ့် အဆုံးမရှိတဲ့ ခရီးရှည်တစ်ခု ဖြစ်ပါတယ်။ ဆရာတွေအတွက် အသက်မွေးဝမ်းကြောင်း တိုးတက်လာစေပြီး အခွင့်အလမ်းတွေ ပိုမိုရရှိနိုင်ပါတယ်။ ဆရာတွေ တော်လာတဲ့အခါမှာ အကျိုးရှိဆုံးက ကျောင်းသားတွေပဲ ဖြစ်တာကြောင့် နှစ်ဦးနှစ်ဖက် အပြန်အလှန်အကျိုးရှိစေတဲ့ ဖော်ပြပါ နည်းလမ်းတွေကို လိုက်နာလုပ်ဆောင်သင့်ပါတယ်။