ပုံစံလေးမျိုးဖြင့် အခြေခံပညာကျောင်းများ ပြန်ဖွင့်နိုင်ဖွယ်ရှိ

အခြေခံပညာကျောင်းများ ပြန်ဖွင့်ခွင့်ရပါက ယခင်က သတ်မှတ်ထားသည့်အတိုင်း ပုံစံလေးမျိုးဖြင့် ပြန်လည်ဖွင့်လှစ်သွားမည်ဖြစ်ကြောင်း အခြေခံ ပညာဦးစီးဌာနညွှန်ကြားရေးမှူးချုပ် ဦးကိုလေးဝင်း က စံတော်ချိန်သို့ ပြောသည်။

အခြေခံပညာ အထက်တန်းကျောင်းများကို ဇူလိုင် ၂၁ ရက်တွင် ပြန်လည်ဖွင့်လှစ်ရာ၌ ပုံမှန်တက်၊ တစ်ပတ်ခြားတက်၊ တစ်ပတ်ခြား နှစ်သုတ်တက်၊ တစ်ပတ်ခြား နှစ်သုတ်တက် သုံးရက်သင် စသည်ဖြင့် ပုံစံလေးမျိုးဖြင့် ပြန်လည် ဖွင့်လှစ်ခဲ့ခြင်းဖြစ်သည်။

"ကျောင်းကို အချိန်ပြည့် ခေါ်တက်ရင် contact တွေ များပြီး ကူးစက်မှာ ကြောက်တဲ့အတွက် အရင်တုန်းက ဖွင့်တဲ့ ပုံစံရှိတယ်လေ။ အထက်တန်းကျောင်းတွေ ပြန်ဖွင့်ခဲ့တုန်းကလိုပုံစံမျိုးနဲ့ ပြန်ဖွင့်သွားမယ်။ ပုံစံလေးမျိုးရှိတယ်။ တချို့က နှစ်သုတ်တက် တစ်ပတ်ခြားဖြစ်မယ်။ တချို့က နှစ်သုတ်တက် တစ်ပတ်ခြား သုံးရက် ဖြစ်မယ်။ ဖွင့်ရင် အဲ့တိုင်းပဲ ဖွင့်ရမယ်။ ဒီပုံစံလေးမျိုးအတိုင်းပဲ ဘာမှမပြောင်းလဲဘူး။ အဲတာတွေက ပြင်ဆင်ပြီးသား ဟိုအရင်တုန်းက မူလတန်းတို့ အလယ်တန်းတို့တောင် ဖွင့်ဖို့ စောင့်နေတာ ခွင့်ပြုချက်မရလို့ ဖွင့်ခွင့်မရခဲ့တာ။ အခြေအနေကောင်းရင် ဖွင့်လိမ့်မယ်" ဟု ဦးကိုလေးဝင်း က ပြောသည်။

ထိုသို့ဖွင့်လှစ်ပါက ကျောင်းတက်ချိန်နည်းသွားမည် ဖြစ်သည့်အတွက် ကျောင်းသား၊ ကျောင်းသူများ အိမ်တွင် လေ့လာသင်ယူနိုင်ရန် ကျောင်းသားကျောင်းသူ၊ မိဘနှင့် ဆရာ/ဆရာမများ ပူးပေါင်းဆောင်ရွက်ကြရမည်ဖြစ်ကြောင်း ဦးကိုလေးဝင်း က ပြောသည်။ 

"ကျောင်းတက်ချိန်က နည်းသွားတဲ့အတွက် စာသင်ချိန်က မလောက်တော့ဘူး။ ဒီအတွက် အိမ်မှာခွဲပြီး သင်ရမယ်။ assignment တွေပေးပြီး အိမ်မှာလုပ်ခိုင်းလိမ့်မယ်။ မိဘတွေက ပူးပေါင်းပါဝင်ရလိမ့်မယ်။ ကလေးတွေလည်း တစ်ပတ်တက် တစ်ပတ်နား ဆိုရင်လည်း နားတဲ့အချိန် အိမ်မှာ သင်ယူရလိမ့်မယ်။ ဒီအတွက်လည်း guide line တွေလုပ်ပြီးသား။ TV Channel တွေကလည်း လွှင့်နေတယ်။ လေ့လာစရာတွေရှိရင် အဲ့ကနေ လေ့လာလို့ရမယ်။ New Normal မှာ မိဘရော၊ ကျောင်းသားရော ဆရာ/ဆရာမတွေရော တက်ညီလက်ညီနဲ့ ဆောင်ရွက်မှရမယ်။ ကျန်းမာရေးဝန်ကြီးဌာန ပညာရေးဝန်ကြီးဌာနက ချမှတ်ထားတဲ့ စည်းမျဉ်းစည်းကမ်းတွေအတိုင်း လိုက်နာရင် အဆင်ပြေပါလိမ့်မယ်" ဟု ၎င်းက ဆိုသည်။

COVID-19 ရောဂါ ဖြစ်ပွားမှုအခြေအနေကြောင့် အခြေခံပညာကျောင်းများ ပြန်ဖွင့်၊ မဖွင့်သည် မသေချာသေးဘဲ အခြေခံပညာကျောင်းများ ဖွင့်လှစ်ရေးကိစ္စနှင့်ပတ်သက်ပြီး ပညာရေးဝန်ကြီးဌာန၊ ကျန်းမာရေးနှင့်အားကစားဝန်ကြီးဌာနတို့ လာမည့်ရက်သတ္တပတ်တွင် ညှိနှိုင်းဆွေးနွေးသွားမည်ဖြစ်ကြောင်း သိရသည်။

ကျန်းမာရေးနှင့်အားကစားဝန်ကြီးဌာနမှ ကိုဗစ်နှင့်အတူ ယှဉ်တွဲနေထိုင်ပြီး စီးပွားရေး၊ လူမှုရေး၊ ပညာရေး၊ ကျန်းမာရေး စသည့် လုပ်ငန်းအသီးသီးကို ပုံမှန်အတိုင်းပြန်လည်လုပ်ကိုင်နိုင်ရန် ကြိုးပမ်းရမည်ဖြစ်ကြောင်း ဒီဇင်ဘာ ၂၂ ရက်က ထုတ်ပြန်ထားသည်။

မြန်မာနိုင်ငံရှိ အေအဆင့်ရရှိသည့် အခြေခံပညာ အထက်တန်းကျောင်းပေါင်း (၆၅၂၆) ကျောင်းကို ကမ္ဘာ့ကပ်ရောဂါ COVID-19 ကြောင့် ပုံမှန်ထက် တစ်လ နောက်ကျ၍ ဇူလိုင် ၂၁ ရက်မှ စတင်၍ ဖွင့်လှစ်ခဲ့ခြင်းဖြစ်သည်။

ပြည်တွင်း ကူးစက်မှု ပြန်လည်ဖြစ်ပေါ်ပြီးနောက် တစ်နိုင်ငံလုံးရှိ ဖွင့်လှစ်ခွင့်ရထားသော အခြေခံပညာအထက်တန်းကျောင်းအားလုံးကို (သြဂုတ် ၂၇ ရက်)မှ စတင်၍ ရက်အကန့်အသတ်မရှိ ယာယီပြန်ပိတ်ခဲ့ရခြင်းဖြစ်သည်။

Source: စံတော်ချိန်