သွားကျန်းမာရေး သူနာပြုဒီပလိုမာ (၂) နှစ်သင်တန်းကို လျှောက်ထားနိုင်ပြီ

သွားဘက်ဆိုင်ရာဆေးတက္ကသိုလ် (ရန်ကုန်နှင့် မန္တလေး) တို့တွင် ၂၀၂၅ ပညာသင်နှစ်အတွက် သွားကျန်းမာရေး သူနာပြုဒီပလိုမာ (Diploma in Dental Nursing) (၂) နှစ် သင်တန်းကို ဖွင့်လှစ်မည်ဖြစ်၍ ဒီဇင်ဘာလ (၁၁) ရက်ထက် နောက်မကျဘဲ လျှောက်လွှာတင်ရမည်ဖြစ်သည်။ 

လိုအပ်သော အရည်အချင်း

• ပြည်ထောင်စုသမ္မတ မြန်မာနိုင်ငံသား ဖြစ်ရမည်။
• တက္ကသိုလ်တစ်ခုခုမှ (သိပ္ပံဘွဲ့) ရပြီးသူ ဖြစ်ရမည်။
• လျှောက်လွှာပိတ်သည့် (၁၁.၁၂.၂၀၂၄) ရက်တွင် အသက် (၂၅) နှစ်ထက် မကျော်လွန်သူဖြစ်ရမည်။ (အခြေခံပညာအထက်တန်း/တက္ကသိုလ်ဝင်တန်း အောင်လက်မှတ်ပါ မွေးနေ့သက္ကရာဇ်အတိုင်းသာ အတည်ပြုမည်)။
• အိမ်ထောင်မရှိသူ အပျို/လူပျို ဖြစ်ရမည်။
• သင်တန်းတက်ရောက်အောင်မြင်ပြီး နိုင်ငံ့ဝန်ထမ်းအဖြစ် ခန့်အပ်ခြင်း ခံရပါက (၃) နှစ်ဆက်တိုက် တာဝန်ထမ်းဆောင်နိုင်သူ ဖြစ်ရမည်။ 
• သင်တန်းတက်ရောက်ရန် ရွေးချယ်ခံရပြီး တက်ရောက်ခွင့်ရစာရင်း ထုတ်ပြန်ပြီးမှ သင်တန်းကို မတက်ရောက်လျှင်ဖြစ်စေ (မှတ်ပုံတင်ခြင်း ပြုသည်ဖြစ်စေ၊ မပြုသည်ဖြစ်စေ)၊ သင်တန်းကို ပြီးဆုံးအောင် မတက်ရောက်လျှင်ဖြစ်စေ၊ သင်တန်းအောင်မြင်ပြီးနောက် သတ်မှတ်ထားသည့် ကာလအတိုင်း နိုင်ငံ့တာဝန်ကို ဆက်လက် မထမ်းဆောင်နိုင်လျှင်ဖြစ်စေ သတ်မှတ်ထားသော လျော်ကြေးငွေ ပေးဆောင်ရန် ကတိခံဝန်စာချုပ် ချုပ်ဆိုနိုင်သူဖြစ်ရမည်။

လျှောက်လွှာတွင် အောက်ပါအချက်အလက်များ ပြည့်စုံစွာ ဖော်ပြရမည်။

• အမည်၊ နိုင်ငံသားစိစစ်ရေးကတ်အမှတ်
• အသက်၊ မွေးသက္ကရာဇ်(ရက်၊ လ၊ နှစ်)
• မိဘအမည်နှင့် နိုင်ငံသားစိစစ်ရေးကတ်အမှတ်
• ပညာအရည်အချင်း
• ဆက်သွယ်ရန်လိပ်စာအပြည့်အစုံ၊ ဖုန်းနံပါတ်
• ဝန်ထမ်းဖြစ်ပါက လက်ရှိ ရာထူး/ဌာန

လျှောက်လွှာနှင့်အတူ အောက်ပါတို့ကို ပူးတွဲ ပေးပို့ရမည်။

• တက္ကသိုလ်ဝင်တန်းစာမေးပွဲ အောင်လက်မှတ် မိတ္တူ (၁) စောင်
• ဘွဲ့လက်မှတ် မိတ္တူ (၁) စောင်
• နိုင်ငံသားစိစစ်ရေးကတ်ပြား မိတ္တူ (၁) စောင်
• နိုင်ငံရေးနှင့် ပြစ်မှုကင်းရှင်းကြောင်း၊ အကျင့်စာရိတ္တကောင်းမွန်ကြောင်း သက်ဆိုင်ရာမြို့နယ် ရဲစခန်း၏ ထောက်ခံစာ မူရင်း (၁) စောင်
• အိမ်ထောင်မရှိသူ အပျို/ လူပျိုဖြစ်ကြောင်း၊ သက်ဆိုင်ရာမြို့နယ်၊ ရပ်ကွက် (သို့) ကျေးရွာ အထွေထွေအုပ်ချုပ်ရေးမှူးရုံး ထောက်ခံစာ မူရင်း (၁) စောင်
• ကိုယ်လက်အင်္ဂါချို့ယွင်းခြင်းမရှိကြောင်း၊ ကိုယ်ရောစိတ်ပါ ကျန်းမာကြောင်း သက်ဆိုင်ရာမြို့နယ် ကျန်းမာရေးဦးစီးဌာနမှူး၏ ဆေးထောက်ခံစာ မူရင်း (၁) စောင်
• လျှောက်လွှာတွင် (၆) လအတွင်း ရိုက်ကူးထားသော ပီပြင်ထင်ရှားသည့် လိုင်စင်ဓာတ်ပုံ (၂) ပုံ (ကျောဘက်တွင်အမည်နှင့် မှတ်ပုံတင်အမှတ် ဖော်ပြရန်)
• ဌာနဆိုင်ရာဝန်ထမ်းဖြစ်လျှင် သက်ဆိုင်ရာဝန်ထမ်းအကြီးအမှူး၏ သင်တန်းတက်ရောက်ခွင့်ပြုကြောင်း ထောက်ခံစာ မူရင်း (၁) စောင်

လျှောက်ထားရမည့်ပုံစံ

မန္တလေးတွင် တက်ရောက်လိုသူများသည် သွားဘက်ဆိုင်ရာဆေးတက္ကသိုလ် - မန္တလေး၊ မြို့သစ် (၁) ရပ်ကွက်၊ ခုတင် (၃၀၀) ဆံ့ သင်ကြားရေးဆေးရုံတောင်ဘက်၊ အရိုးရောဂါအထူးကုဆေးရုံကြီးမြောက်ဘက်၊ ချမ်းမြသာစည်မြို့နယ်၊ မန္တလေးမြို့တွင် လျှောက်ထားရမည်ဖြစ်ပြီး ရန်ကုန်တွင် တက်ရောက်လိုသူများသည် သွားဘက်ဆိုင်ရာဆေးတက္ကသိုလ် - ရန်ကုန်၊ အမှတ် (၅၈၂)၊ သံသုမာလမ်း၊ သွပ်ဝိုင်းကြီးရပ်ကွက်၊ သင်္ဃန်းကျွန်းမြို့နယ်၊ ရန်ကုန်မြို့တွင် လျှောက်ထားရမည်။

ရေးဖြေစာမေးပွဲဖြေဆိုခွင့်ရရှိသူများ၏ ခုံအမှတ်စာရင်းကို သွားဘက်ဆိုင်ရာဆေးတက္ကသိုလ် (ရန်ကုန်နှင့် မန္တလေး) တို့မှာ (၁၃-၁၂-၂၀၂၄) ရက်တွင် ကြေညာထားမည်ဖြစ်ပြီး စာမေးပွဲဖြေဆိုမည့် ကတ်များကို (၁၇-၁၂-၂၀၂၄) ရက်မှစ၍ ထုတ်ယူနိုင်ပါသည်။ 

(၁၉-၁၂-၂၀၂၄) ရက် (ကြာသပတေးနေ့) နံနက် (၉) နာရီမှ မွန်းတည့် (၁၂) နာရီအထိ မြန်မာစာ၊ အင်္ဂလိပ်စာနှင့် အထွေထွေဗဟုသုတ (၃)နာရီ မေးခွန်းလွှာ (၁) စုံကို လျှောက်လွှာတင်ထားသည့် တက္ကသိုလ်တွင် သွားရောက်ဖြေဆိုရမည်။

အခြားစုံစမ်းမေးမြန်းလိုသည်များရှိပါက သွားဘက်ဆိုင်ရာဆေးတက္ကသိုလ် (ရန်ကုန်) ဖုန်း - ၀၉-၄၄၈၀၄၃၅၂၀ နှင့် သွားဘက်ဆိုင်ရာဆေးတက္ကသိုလ် (မန္တလေး) ဖုန်း ၀၂-၄၀၈၀၇၃၅၊ ၀၂-၄၀၈၀၇၃၆၊ ၀၂-၄၀၈၁၂၄၁၊ ၀၂-၂၈၄၇၈၀၃ သို့ ရုံးချိန်အတွင်း စုံစမ်းမေးမြန်းနိုင်ပါသည်။

Related Article: သွားတုလုပ်ငန်းကျွမ်းကျင်မှု ဒီပလိုမာသင်တန်း လျှောက်လွှာ ခေါ်ယူ

>> https://www.edge.com.mm/article/diploma-in-dental-technology.html