KG+12 တက္ကသိုလ်ဝင်စာမေးပွဲမှာ အမှတ်နည်းခဲ့သော်လည်း ဝင်ခွင့်အမှတ်မြင့်သည့် ရေဆင်းစိုက်ပျိုးရေးတက္ကသိုလ်နှင့် မွေးမြူရေးဆိုင်ရာ ဆေးတက္ကသိုလ်တို့ကို တက်ရောက်လိုသူများအနေဖြင့် အခွင့်အရေးတစ်ခု ရှိလာပါပြီ။
၂၀၂၄-၂၀၂၅ ပညာသင်နှစ်တွင် ဖွင့်လှစ်မည့် စိုက်ပျိုးရေးနှင့် မွေးမြူရေး ဒီပလိုမာသင်တန်းများကို တက်ရောက်ပြီး ထူးချွန်အမှတ်ဖြင့် အောင်မြင်လျှင် ရေဆင်းစိုက်ပျိုးရေးတက္ကသိုလ်နှင့် မွေးမြူရေးဆိုင်ရာဆေးတက္ကသိုလ်တို့ကို တက်ရောက်ရန် ဝင်ခွင့်ဖြေဆိုခွင့်ရရှိမည်ဖြစ်သည်။
Related Article : ငါးလုပ်ငန်းသိပ္ပံမှာ ဒီပလိုမာယူပြီး ရန်ကုန်တက္ကသိုလ်မှာ B.Sc ဘွဲ့ဆက်တက်မယ်
>> https://www.edge.com.mm/article/fisheries-and-aquaculture.html
၂၀၂၄-၂၀၂၅ ပညာသင်နှစ်အတွက် စိုက်ပျိုးရေးဒီပလိုမာသင်တန်း တက်ရောက်လိုသူများသည် စိုက်ပျိုးရေးနှင့် မွေးမြူရေးသိပ္ပံ (ပျဉ်းမနား၊ သထုံ၊ မြောင်းမြ၊ ရွှေဘို။ ပုသိမ်ကြီး၊ ပွင့်ဖြူ၊ သာယာ၀တီ၊ ထားဝယ်၊ ဟဲဟိုး၊ မြစ်ကြီးနာ၊ ဒီးမော့ဆို၊ ဘားအံ၊ လုံပီး၊ ကျောက်တော်၊ ဟုမ္မလင်း) တို့တွင် လျှောက်ထားနိုင်ပြီး မွေးမြူရေးဒီပလိုမာသင်တန်း တက်ရောက်လိုသူများသည် စိုက်ပျိုးရေးနှင့် မွေးမြူရေးသိပ္ပံ (ပျဉ်းမနား၊ ပုသိမ်ကြီး၊ ဟဲဟိုး၊ ပွင့်ဖြူ၊ သာယာဝတီ၊ သထုံ၊ မြစ်ကြီးနား၊ ဘားအံ၊ မြောင်းမြ) တို့တွင် လျှောက်ထားနိုင်သည်။
ဒီပလိုမာသင်တန်းများ၏ သင်တန်းကာလမှာ (၃) နှစ်ဖြစ်ပြီး သင်တန်းပြီးဆုံးပါက ဒီပလိုမာအောင်လက်မှတ် ပေးအပ်မည်ဖြစ်ပါသည်။ စိုက်ပျိုးရေးဒီပလိုမာကို ထူးချွန်စွာအောင်မြင်သူသည် ရေဆင်းစိုက်ပျိုးရေးတက္ကသိုလ်သို့လည်းကောင်း၊ မွေးမြူရေးဒီပလိုမာကို ထူးချွန်စွာ အောင်မြင်သူသည် မွေးမြူရေးဆိုင်ရာဆေးတက္ကသိုလ် (B.A.Sc) သင်တန်းသို့လည်းကောင်း တက်ရောက်ရန် ဝင်ခွင့်ဖြေဆိုခွင့်ရရှိမည်ဖြစ်ပါသည်။
လျှောက်ထားသူသည် အောက်ပါအရည်အချင်းများနှင့်ပြည့်စုံရမည်။
(က) ပြည်ထောင်စုသမ္မတမြန်မာနိုင်ငံသားဖြစ်ရမည်။
(ခ) စိုက်ပျိုးရေးဒီပလိုမာသင်တန်းကို အခြေခံပညာအထက်တန်း KG+12 တက္ကသိုလ်ဝင်စာမေးပွဲကို ဓာတုဗေဒ၊ ရူပဗေဒဘာသာရပ်များ ပါဝင်သည့် မည်သည့်ဘာသာတွဲများဖြင့်ဖြစ်စေ အောင်မြင်သူများလျှောက်ထားနိုင်သည်။
(ဂ) မွေးမြူရေးဒီပလိုမာသင်တန်းကို အခြေခံပညာအထက်တန်း KG+12 တက္ကသိုလ်ဝင်စာမေးပွဲတွင် ဇီဝဗေဒ ဘာသာတွဲဖြင့် အောင်မြင်သူများ လျှောက်ထားနိုင်သည်။
(ဃ) လျှောက်လွှာပိတ်ရက် ၁၀.၉.၂၀၂၄ ရက်တွင် အသက် (၂၂)နှစ်ထက် မကြီးသူ ဖြစ်ရမည်။
လျှောက်လွှာနှင့်အတူ အောက်ဖော်ပြပါအထောက်အထားများ ပူးတွဲတင်ပြရမည်။
(က) တက္ကသိုလ်ဝင်စာမေးပွဲအောင်မြင်ကြောင်း သက်ဆိုင်ရာကျောင်းအုပ်ကြီး ထောက်ခံချက် (မူရင်း)
(ခ) တက္ကသိုလ်ဝင်စာမေးပွဲ အမှတ်စာရင်း (မိတ္တူ) (ကျောင်းအပ်နှံသည့်အချိန်တွင် မူရင်းတင်ပြရမည်)
(ဂ) စိုက်ပျိုးမွေးမြူရေးလုပ်ကိုင်ရန် ကျန်းမာရေးကောင်းမွန်ကြောင်း ဆရာဝန်၏ ထောက်ခံချက်
(ဃ) အကျင့်စာရိတ္တကောင်းမွန်ကြောင်း၊ ပြစ်မှုကင်းရှင်းကြောင်း သက်ဆိုင်ရာမြို့နယ်ရဲစခန်း(သို့) ကျေးရွာ/ ရပ်ကွက်အုပ်ချုပ်ရေးမှူးတို့၏ ထောက်ခံချက် (မူရင်း)
(င) လျှောက်ထားသူနှင့် မိဘနှစ်ပါး၏ နိုင်ငံသားစိစစ်ရေးကဒ် (မိတ္တူ)များနှင့် အိမ်ထောင်စုဇယား(မိတ္တူ)
(စ) လိုင်စင်ဓာတ်ပုံ (နောက်ခံအပြာရောင်ဖြင့်) (၅)ပုံ
လျှောက်လွှာများကို မိမိတက်ရောက်လိုသော စိုက်ပျိုးရေးနှင့်မွေးမြူရေးသိပ္ပံကျောင်းသို့ ၁၀.၉.၂၀၂၄ ရက်ထက် နောက် မကျစေဘဲ တိုက်ရိုက်ပေးပို့ လျှောက်ထားရမည်။ သတ်မှတ်ရက်ထက် နောက်ကျသော လျှောက်လွှာများ၊ မပြည့်စုံသော လျှောက်လွှာများအား ထည့်သွင်းစဉ်းစားမည်မဟုတ်ပါ။
တက်ရောက်ခွင့်ရရှိသူများနှင့် ကျောင်းဖွင့်လှစ်မည့်ရက်အား လျှောက်လွှာတင်ထားသည့် သက်ဆိုင်ရာစိုက်ပျိုးရေးနှင့်မွေးမြူရေးသိပ္ပံကျောင်းများမှ အကြောင်းကြားပေးမည်ဖြစ်ပါသည်။ အသေးစိတ်သိရှိလိုပါက တယ်လီဖုန်းအမှတ် ၀၆၇-၃၄၁၀၅၈၈ သို့ ဆက်သွယ်မေးမြန်းနိုင်ပါသည်။
စိုက်ပျိုးရေးဒီပလိုမာနှင့် မွေးမြူရေးဒီပလိုမာ ဝင်ခွင့်လျှောက်လွှာကို ပုံတွင် ကြည့်ရှုနိုင်ပါသည်။
--------------------------------------------------
VPN မလိုဘဲ ပညာရေးသတင်းအစုံအလင်ကို ဖတ်ရှုနိုင်ဖို့ Myanmar Education Guide ရဲ့ Telegram Channel ကို အခုပဲ Join ထားလိုက်တော့နော်။
Join our Telegram Channel
