တတိယတန်းမှ ဒသမတန်းအထိ ဒီဇင်ဘာ အခန်းဆုံးစာမေးပွဲစစ်ရန် ညွှန်ကြား

* သူငယ်တန်းမှ ဒုတိယတန်းအထိ စာမေးပွဲမရှိ *

အခြေခံပညာကျောင်းများတွင် KG (သူငယ်တန်း)၊ Grade-1(ပထမတန်း)၊ Grade-2 (ဒုတိယတန်း) မှလွဲ၍ ကျန်အတန်းများကို ဒီဇင်ဘာ အခန်းဆုံးစစ်ဆေးသည့် စာမေးပွဲများကျင်းပရန် အခြေခံပညာ ဦးစီးဌာနက နိုဝင်ဘာပထမပတ်တွင် ညွှန်ကြားထားသည်။

ထိုညွှန်ကြားချက်အရ တတိယတန်းမှ ဒသမတန်းအထိ အတန်းအားလုံး အောက်တိုဘာနှင့် နိုဝင်ဘာတွင် သင်ကြားထားသည့် သင်ခန်းစာများကို ဘာသာရပ်တစ်ခုလျှင် စာသင်ချိန် တစ်ချိန်နှုန်းဖြင့် တစ်ရက်လျှင် နှစ်ဘာသာ ဒီဇင်ဘာအတွင်း စစ်ဆေးရမည် ဖြစ်သည်။

ထို့ပြင် စနစ်သစ်သင်ရိုးညွှန်းတမ်းအသစ်များဖြင့် သင်ကြားနေသော KG၊ Grade-1၊ Grade-2 အတန်းများတွင် ကျောင်းသား၊ကျောင်းသူများ၏ တတ်မြောက်မှုကို စာမေးပွဲ ကျင်းပစစ်ဆေးမှုများ မပြုလုပ်ရန်နှင့်  ညွှန်ကြားချက်အတိုင်း ဆောင်ရွက်ရန် အခြေခံပညာ ဦးစီးဌာနက တိုင်းဒေသကြီးနှင့် ပြည်နယ်ပညာရေးမှူးရုံးများမှတစ်ဆင့် မြို့နယ်ပညာရေးမှူး များ၊ ကျောင်းအုပ်ကြီးများ၊ ဆရာ၊ဆရာမများ သိရှိစေရန် ညွှန်ကြားထားသည်။

‘‘KG၊ Grade-1၊ 2 က စာမေးပွဲစစ်ဖို့  မပြောထားဘူး။ သူတို့ကို တတ်ကျွမ်းမှု၊ တတ်မြောက်မှုစစ်ဆေးဖို့ ပဲပြောတာ။ တတ်မြောက်မှု စစ်ဆေးတယ်ဆိုတာက သူတို့ကို ဖတ်တတ်၊ ရေးတတ်၊ တွက်တတ် လားဆိုတဲ့ အခြေခံတတ်ကျွမ်းမှုတွေ ရှိဖို့အတွက်ကို စစ်ပေးရမှာ။ စာအုပ်ထဲက စာကိုအလွတ်ကျက်ပြီး ပြန်ပြီး စာမေးပွဲစစ်တာမျိုး လုပ်လို့မရဘူး။ ဒါပဲသင်၊ ဒါပဲကျက်၊ ဒါပဲဖြေခိုင်း ရင်ဘယ်လိုလုပ်ပြီး စဉ်းစားတွေးခေါ်မှုရှိတဲ့ ကလေးတွေ ဖြစ်လာတော့မလဲ’’ဟု အခြေခံပညာဦးစီးဌာန တာဝန်ခံ ညွှန်ကြားရေးမှူးချုပ် ဦးကိုလေးဝင်းက ပြောသည်။

ပြီးခဲ့သည့် အောက်တိုဘာကလည်း သူငယ်တန်း၊ ပထမတန်း၊ ဒုတိယတန်းမှလွဲ၍ ကျန်အတန်းများကို နှစ်ဝက်ဆုံး စာမေးပွဲစစ်ဆေးရန် အခြေခံပညာဦးစီး ဌာနက ညွှန်ကြားခဲ့သည်။

သို့သော် သူငယ်တန်းမှ ဒုတိယတန်းအထိ စာမေးပွဲမစစ်ရန် ညွှန်ကြားချက်အတိုင်း မလိုက်နာဟုဆိုကာ အမက (၂၁) သင်္ဃန်းကျွန်းမှ မူလတန်း ကျောင်းအုပ် ဆရာမကြီးကို ရန်ကုန်တိုင်းဒေသကြီး ပညာရေးမှူးရုံးက သတိပေးပြီး ခံဝန်ကတိရေးထိုးစေခဲ့သည်။

ယခင်ပညာသင်နှစ်များက အခြေခံပညာကျောင်းများတွင် ဇူလိုင်မှ ဖေဖော်ဝါရီအထိ တစ်နှစ်လျှင် ကိုးကြိမ်မှ ၁၀ ကြိမ်အထိ စာမေးပွဲ ကျင်းပခဲ့သည်။ ယခုပညာသင်နှစ်တွင် KG၊ Grade-1၊ Grade-2 များကို စာမေးပွဲ မစစ် ဆေးသည့်အပြင် ကျန်အတန်းများကိုလည်း ဇူလိုင်နှင့်  ဒီဇင်ဘာတွင် အခန်းဆုံးစစ်ဆေးခြင်း စာမေးပွဲ၊ အောက်တိုဘာတွင် နှစ်ဝက်ဆုံးစာမေးပွဲ၊ ဖေဖော်ဝါရီတွင် နှစ်ဆုံးစာမေးပွဲဟူ၍ လေးကြိမ်သာ ကျင်းပရန် ညွှန်ကြားထားသည်။

‘‘စာမေးပွဲက ကလေးတွေကို တော်တော်ကြီးကို Pressure ပေးနေတာ။ ဒီစာမေးပွဲ Pressure တွေကို လျော့စေချင်တာ။ အရင်တုန်းက အများကြီးပဲ။ ChapterEnd Test (အခန်းဆုံးစစ်ဆေးခြင်း) ကို အရင်တုန်းက အနည်းဆုံး ခုနစ်ကြိမ် ရှိတယ်။

တချို့ ရှစ် ကြိမ်စစ်တယ်။ Year End Test (နှစ်ဆုံးစစ်ဆေးခြင်း)နဲ့ ChapterEnd Test ကို တစ်နှစ် ၁၀ ကြိမ်လောက်ထိ စစ်တာ။ စာမေးပွဲနဲ့ပဲ တို့ ဆရာ၊ ဆရာမတွေက လုံးချာလည်လိုက်နေတာ။ တစ်နည်းအားဖြင့် ဒီစာမေးပွဲတွေရဲ့ Work Load ကိုလည်း လျှော့ချင်တာ’’ဟု ဦးကိုလေးဝင်းက ဆိုသည်။

KG+12 စနစ်အရ ၂၀၁၆-၁၇ ပညာသင်နှစ်ကစတင်ကာ KG၊ ၂၀၁၇-၁၈ ပညာသင်နှစ်က စတင်ကာ Grade-1၊ ယခု ၂၀၁၈-၁၉ ပညာသင်နှစ်ကစတင်ကာ Grade-2 တို့၌ ကျောင်းသား၊ ကျောင်းသူ များကို သင်ရိုးညွှန်းတမ်းအသစ်ဖြင့် သင်ကြားနေသည်။

KG+12 စနစ် သင်ရိုးညွှန်းတမ်းအသစ် မပြောင်းလဲမီက သူငယ်တန်းမှ ဒသမတန်းအထိ လစဉ်အခန်းဆုံးစာမေးပွဲများ စစ် ဆေးခဲ့သည်။

ပညာရေးလမ်းညွှန်website တွင်မြန်မာတစ်နိုင်ငံလုံးတွင် ပြောင်းလဲနေသော ပညာရေးသတင်းများ၊ အခမဲ့ ပညာရေးသင်ကြားပေးနေသည့် သင်တန်းကျောင်းများ၊ ပြည်တွင်း၊ ပြည်ပပညာသင်ဆုများ၊ ပညာရေးအတွက် သင်တန်းများ၊ အလုပ်ခွင်ဝင်ရန် လိုအပ်သော သင်တန်းများ စသည်တို့ပါဝင်ပါတယ်နော်...။

source: 7day