၁၀ တန်းမေးခွန်းပုံစံသစ်တွင် အလွတ်ကျက်မှတ်ခြင်းထက် ကိုယ်ပိုင်စဉ်းစားတွေးခေါ်ခြင်းကို ဦးစားပေးပါဝင်မည်

15 August, 2018

သြဂုတ်လ ၁၄ ရက် ပြည်သူ့လွှတ်တော်အစည်းအဝေးတွင် မိုင်းတုံမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးအောင်ကျော်ဦးမေးမြန်းသော ၂၀၁၈-၁၉ ပညာသင်နှစ်အတွက် တက္ကသိုလ်ဝင်စာမေးပွဲ မေးခွန်းများ

ပုံစံပြောင်းမေးမြန်းရန် စီစဉ်ထားခြင်းနှင့် ပတ်သက်ပြီး မည်သည့် ရည်ရွယ်ချက်ဖြင့် ယခုကဲ့သို့ ချက်ချင်းပြောင်းလဲရန် စီစဉ်ထားသည်ကို သိလိုခြင်းနှင့် အလေ့အကျင့်ရရှိစေရန် ယခုနှစ်တွင် န၀မတန်းမှသာ စတင်ပြောင်းလဲပေးရန် အစီအစဉ်ရှိမရှိ မေးခွန်းများကို ပညာရေးဝန်ကြီးဌာန ဒုတိယ၀န်ကြီး ဦးဝင်းမော်ထွန်းက အထက်ပါအတိုင်း ဖြေကြားခဲ့ခြင်းဖြစ်သည်။

"တက္ကသိုလ်ဝင်စာမေးပွဲ မေးခွန်းပုံစံ ပြောင်းလဲရခြင်းရဲ့ ရည်ရွယ်ချက်မှာ ပညာရေးအာမခံချက်ရရှိစေရန်၊ ကျောင်းသင်ပညာရေးစနစ် တိုးတက်စေရန်၊ ကျောင်းသားများ၏ သင်ယူမှုရလဒ် မျာ တိုးတက်လာစေရန်၊ တက္ကသိုလ်ဝင်တန်း ကျောင်းသား၊ ကျောင်းသူများ အလွတ်ကျက်မှတ်ဖြေဆိုမှု လျော့နည်းစေရန်နှင့် စဉ်းစားတွေးခေါ်မှု အားပေးမြှင့်တင်ရန် တို့ ဖြစ်ပါတယ်။

တက္ကသိုလ်ဝင်ခွင့်စာမေးပွဲ မေးခွန်းပုံစံအသစ်တွင် အလွတ်ကျက်မှတ်မှုထက် ကိုယ်ပိုင်စဉ်းစား တွေးခေါ်မှုကို ဦးစားပေးသော မေးခွန်းများ ပိုမိုပါဝင်လာပါတယ်" ဟု ပြောသည်။

မေးခွန်းပုံစံတစ်ခုလုံးကို အသစ်ပြောင်းလဲသွားခြင်းမဟုတ်ဘဲ မေးခွန်းပုံစံအများစုကိုမူ ယခင်သမားရိုးကျမေးရိုးမေးစဉ်အတိုင်း ဆက်လက်မေးမြန်းသွားမည် ဖြစ်သည်။

သင်ရိုးအားလုံးကို လေ့လာစေရန် ရည်ရွယ်ပြီး သင်ခန်းစာများအားလုံးကို လွှမ်းခြုံသည့် မေးခွန်းများဖြင့် ဆောင်ရွက်မည် ဖြစ်သည်။

မေးခွန်းပုံစံတွင် လွယ်သည့်မေးခွန်းနှင့် ခက်သည့်မေးခွန်း မျှတစွာ ပါဝင်ပြီး သင်ရိုးအားလုံး ခြုံငုံလေ့လာထားသော ကျောင်းသားများ အခက်အခဲမရှိ ဖြေဆိုနိုင်မည့် မေးခွန်းမျိုးသာ ဖြစ်ကြောင်း ၄င်းက ဆက်လက်ပြောသည်။

မိမိတို့ တက်ရောက်လိုသည့် သင်တန်းကျောင်းများနှင့် ပုဂ္ဂလိကကျောင်းများကို ရှာဖွေလိုပါက ဒီ Link မှာရှာဖွေနိုင်ပါသည်။

ပညာရေးလမ်းညွှန် website တွင် ပါဝင်သော သင်တန်းများ၊ ကျောင်းများ၊ Scholarship၊ Knowledge များနှင့် ပတ်သက်သော အချက်အလက်များကို ၀င်ရောက်ရှာဖွေ ဖတ်ရှုနိုင်ပါတယ်။